O sin i fruts di seconde e us contin ce che o vin fat par preparâ la fieste di fin da l'an scolastic.
Volevin fa viodi ai gjenitôrs dut il lavôr fat durant l’an su la musiche e i colôrs.
O erin partîs di lontan, parcè che o vin scuviert ce che sunavin i oms de preistorie, i struments che a costruivin, o vin scoltât i suns che o podin fâ cul nestri cuarp, i suns che o sintin tal mont ator ator.
Cun la mestre Letizie, la nestre insegnant di musiche, o vin imparât a scrivi i rumôrs e i suns.
Dopo vin piturât e cognossût un poc ale volte ancje i colôrs, e vin tornat a cjalà tancj cuadris di pitôrs par viodi cemût che lôr ju an doprâts.
Il nestri preferît al è, ancje par chest an, Mirò che za o vevin cognossût l'an passât: o vin fat parfin un “libri”su di lui!!!
Cussì o vin sielzût doi cuadris, (parcè che si lavorave in doi grups di nô) e ju vin tornats a fâ … cuasi come chei vêrs.
Lavorant insieme si dà ognidun un tocut di nô e dal nestri savê fâ cussì o vin dividût ancje i cuadris in tocs, come un rompicjâf, e ju vin tornâts a tacà la zornade da la fieste par fa viodi che ducj insieme o podin fa … GRANDIS ROBIS!!!!