Il puar e l'orcul
Chel lavôr al è stat fat a scule. I fruts da la classe 3 A an costruìt un libri - teatro par contà la storie dal Puâr e l'orcul.
Le an contade ai fruts de scuele, a Arianna, bibliotecarie di Sedeàn e naturalmentri a cjase.
Cussì..par tegni di cont chiste conte.
◆•••●●◉●●•••◆
Un om che si clamave Meni si cjate a passâ pal bosc. Si ferme a cjase di un contadin a durmî. Tal doman di buinore il paron di cjase i dîs di stâ atent viodût che tal bosc al è a stâ un orcolat cu la sô femine che al mangje ducj chei che i capitin a tîr. Meni però si fâs dâ un toc di scuete e al va indenant.
clic per ingrandire
Cuant che al è tal bosc Meni al viôt une cjase: e je la cjase dal orcul! Meni alore si rimpine sù pal arbul. L’orcul però, sintint il so odôr, al va sot dal arbul e i dîs di dismontâ. Meni però svelt i dîs: -Viôt che jo no ai pôre di te! Cjale che jo o soi bon di fruçâ il marmul cuntune man!! E al tire fûr la scuete e la strice. L’orcul alore i dîs: -Orpo! Tu sês fuart come me. Se si metìn insiemi o podaressin dominâ il mont! Ven a cjase mê a gustâ cun me.
Cuant che a rivin a cjase dal orcul, la sô femine e prepare une polente. Finît di mangjâ, l’orcul al cjape sù un pâl di fier che al pesave 300 chilos e al dîs a Meni di lâ cun lui tal curtîl e di fâ une gare par viodi chel che al tire il pâl plui lontan. L’orcul al tire il pâl une vore lontan. Meni alore al tache a dî: -Ve ca, cumò o tiri jo il pâl e piês par chei che si cjatin a jessi a Lignan parcè che par sigûr il pâl al rivarà fin là! L’orcul, che nol voleve pierdi il so pâl, i rispuint: -Pal amôr di Diu. Lasse stâ. Anìn invezit a spacâ i lens tal bosc.
E a van tal bosc. L’orcul, che al veve une manarie une vore grande, al taiave çocs di chei di chilo e invezit Meni, cuntun manarin une vore plui piçul, al taiave sclesis finis come fulminants. Alore l’orcul i dîs: -Sint po, Meni, ce fâstu? E Meni svelt i rispuint: -O tai i lens piçui par podê leâ i arbui ducj intîrs! A un ciert moment la manarie dal orcul e reste incjastrade tal tronc di un arbul e l’orcul al domande a Meni di judâlu. Meni svelt al dîs al orcul di slargjâ cu lis mans la viertidure dal tronc intant che lui al cîr di gjavâ la manarie. L’orcul, cuant che Meni al gjave la manarie, al reste incjastrât tal tronc e al dîs a Meni di lâ a cjase sô e di domandâ a la sô femine sedi il coni grant che chel piçul.
Meni alore al côr svelt a cjase dal orcul e al dîs a la femine che il so paron al comande di dâi la borse grande e la borse piçule dai bêçs che al à di comprâ dai marcjadants vidiei e vacjis. La femine dal orcolat e da ducj i bêçs a Meni che al scjampe di corse.
Juste fûr dal bosc, al cjate un pastôr e i domande di dâi une piore. Il pastôr al rispuint che no son sôs ma Meni al insist che le paiarà ben. Cussì il pastôr al da la piore a Meni che doprant la roncee i gjave i budiei e ju bute tal mieç de strade e i dîs al pastôr: -Se al passe di chi un orcul dîs che i budiei a son i miei.
Intant l’orcul, che al veve rivât a liberâsi di bessôl, al torne a cjase e al domande a la femine indulà che al è lât Meni e cuant che al capìs di jessi stât freât al cor a cirîlu.
Al rive li dal pastôr e al viôt i budiei da la piore butâts tal mieç de strade. Il pastôr al fâs ce che i veve domandât Meni e al dîs al orcul che Meni si è gjavât vie i budiei par cori plui fuart. L’orcul alore al pense di fâ come Meni e si sbudiele cu la roncee e subit al cole par tiere muart. E la sô femine e je ancjemò che lu spiete a cjase!
