Vai direttamente al contenuto principale
Ora sei in: home > tracce di storia > La scuele ai timps dai nonos
Logo di CollinRete

Tracce di storia

La scuele ai timps dai nonos

Test  scrit dai arlêfs de classe tierce de scuele primarie di Flaiban

Anno scolastico 2011/2012

Nô fruts di classe tierce o vin intervistât i nestris nonos e ur vin domandât cemût che e jere la scuele ai lôr timps. Ducj a son stâts disponibii e contents di rispuindi aes nestris domandis e cussì, dopo vê racuelt il materiâl, o vin scrit chest test.

La plui part dai nonos e à podût frecuentâ dome la scuele elementâr dal paîs indulà che al viveve, dome pocjissims a àn fat lis scuelis medis; nissun di chei che o vin intervistât al à frecuentât une scuele superiôr. Chest parcè che bêçs no ‘nd jerin e tes fameis contadinis a coventavin braçs par lavorâ i cjamps.
In chei timps no jere la coriere cemût che e je in dì di vuê e nancje i gjenitôrs a podevin puartâju, duncje si lave a scuele a pît, metint sù i tipics çocui di len ancje cuant che al ploveve o al faseve cetant frêt e no jere par nuie facile. Chei plui fortunâts a vevin une biciclete.
Rivâts a scuele ju spietavin stanzis grandis e fredis che a podevin tignî ancje 30 fruts; cui che al podeve al puartave a scuele un toc di len che al meteve sù pe stue, in chest mût si sclipive l’ambient.
In gjenar i mestris a jerin sevêrs e a cjastiavin dispès i arlêfs: chel che nol veve studiât al vignive fat inzenoglâ sui claps, chel che al disturbave al vignive petât cuntune bachete su lis mans o mandât in altris classis, in cualchi câs “al svolave” cualchi pataf e nissun si permeteve di protestâ.
I frutats brâfs chei che a fasevin ben i compits, a vignivin premiâts e a lavin tes altris classis a lei i lôr tescj.
Ducj a vevin di doprâ il grumâl che par solit al jere neri: chel des feminis al veve un floc ros o rose, i masclis blu.
Il materiâl di scuele no jere tant: un cuader, un libri, il penin tal puest des penis, l’ingjustri e la cjarte di suiâ par netâ lis pussibilis maglis o i erôrs; i plui fortunâts a vevin cualchi matite colorade. Dut al jere metût dentri di une cartele di corean.
Lis materiis che a studiavin a jerin: talian, aritmetiche, religjon, storie, gjeografie, dissen, musiche, gjinastiche, cun di plui al jere ancje il vôt pe biele scriture.
La cjampane e sunave a misdì e a lavin a cjase a gustâ.
Dopo jessi lâts a scuele tancj a lavin a vore tai cjamps, tes stalis o a cjoli la aghe tes fontanis par dâ di bevi a lis bestiis.
Ma no jere dome fadie!
La sere a butavin cualchi podin di aghe tes stradutis e cussì di gnot a deventavin une lastre di glaç e a buinore a podevin divertisi a sbrissâ o a sgliciâ prime di lâ a scuele.

I nestris nonos a disin che une volte, la scuele e jere plui dificile e plui fadiose di chê di cumò, ma dut câs a varessin volût continuâ a studiâ e imparâ plui robis, par chest motîf a continuin a disinus di studiâ e di impegnâsi il plui pussibil e nô o cirìn di scoltâju.

Grazie a ducj i nonos che a àn colaborât cun nô!

Immagine della testata in alto: Panorama da Arcano Superiore
Per gentile concessione dell'autore, Vittorio Sgoifo socio del Circolo Fotografico "Ernesto Battigelli" di San Daniele del Friuli