Giocando si impara

Il zuiâ di une volte….

Ativitât di lenghe furlane, Istitût Comprensîf di Glemone, scuele primarie di Ospedâl, classe cuinte

Une volte i fruts a scugnivin judâ tai cjamps o a cjase e no vevin timp di zuiâ.

Si cjatavisi a zuiâ soredut la domenie dopo i gjespui: “a platâsi”  a “corisi daûr” dulintor pe campagne fintremai che si jere sfladâts.

Chescj a son dai zûcs che o vin provât a fâ insieme tes oris di motorie.

Cuarde

Si po zuiâ un par un, saltant cuntune cuarde curte o pûr cuntune lungje che a ven fate zirâ simpri plui di corse di dôs zuiadoris intant che une tierce stant tal mieς, e salte cui pîts tacâts ogni volte che al ven sfiorât il teren; se si inςopede o si ingredee e piert e dunςje e à di lâ fûr dal zûc.

Al po jessi stabilît un ciert numar di salts par finî la gare e determinâ il vincitôr.

cliche su lis figuris par ingrandîlis

Gjate vuarbe

Un zuiadôr al ven bendât e fat zirâ intor di se par fai pierdi l’orientament.

Al à di cjapâ un dai compagns e, judantsi cu lis mans, ricognossilu  par che chest al cjapi il so puest.

Cavalete

Il zuiadôr sielzût si plee poiantsi cu lis mans sui zenoi e i compagns lu saltin, o pûr si sbassin jù plui zuiadôrs e chei altris ju saltin vie vie come cjavai sui ostacui. Si puedin fâ ancje dôs scuadris.

I cuatri cjantons

Si zuie in cinc.

I cjantons a puedin sei cuatri amis che a àn di metisi in maniere di formâ un cuadrât.

Si fâs la conte e cui che al jes al fâs di vuardie metintsi tal mieç dal cuadrât.

I cjantons a àn di gambiâsi il puest (ancje di traviers) rivant a plaçâsi prin de vuardie, chel che al reste fûr al cjape il puest tal mieç.

Bale stop

Il zûc si fâs intun grant slarc.

Cuntune conte si sielç un frut, chest al bute pal aiar la bale e al clame un compagn par esempli  ‘Sef, alore ducj a corin vie, fûr che ‘Sef  che al cjape la bale svelt e al vose “stop”.

Alore ducj si fermin di bot. ‘Sef cun trê pas al va dongje di un compagn e i tire intor la bale.

Se lu cjape, chest al va fûr, se la bale no lu cjape alore al va fûr ‘Sef.

Il zûc al va indenant  cussì.  Al vinç la partide cui che al reste par ultin.

Il lôf e l'agnel

Si zuie suntun teren segnât insom e da pît di dôs liniis. Po dopo si tire une linie tal mieç.

Si fâs la conte e si sielς il lôf, che al varà di metisi a metât dal cjamp.

Ducj chei altris fruts a àn di metisi di une bande dal cjamp e al vie a tacaran a cori par superâ la linie di mieς e lâ a finîle di chê altre bande cence fâsi tocjâ dal lôf.

Cui che al ven tocjât al deventarà lôf e al varà di cjapâ i zuiadôrs che a van di ca e di là de metât dal cjamp.

Al vinç chel che al varà passât la linie di mieç cence mai fâsi cjapâ.

Zûcs che a fasevin une volte i nonos ….

Il pindul

Chest zûc al vignive fat cuntun len di 3 cm di spessôr e 10-15 cm di lungjece, sbecât di dutis dôs lis bandis.

Il baston al vignive poiât par tiere o suntun clap, cuntun altri baston si dave un colp da pît o insom dal “pindul” e cuant che al svolave si lu tirave di gnûf di ce bande che si voleve.

Si scugnive tirâlu di volte in volte simpri plui lontan o simpri plui dongje a un puest o a une robe che e vignive decidude insieme.

Il cercli

Si faseve rodolâ par tiere un cercli fat cuntune vuiscje di morâr o un cerclon di biciclete cence rais. Si veve di tignîle in ecuilibri cuntun baston o cuntun toc di fier.

Si podeve zuiâ di bessôi o cun altris, vedint cui che al faseve lâ il cercli plui svelt.

Sant Michêl

Si po zuiâ in doi o plui zuiadôrs.

Un frut al scuint  alc di piçul o un claput intune man e al fâs viodi dutis dôs lis mans a chei altris che a àn di induvinâ in ce man che e je scuindude la robe.

Chel che al induvine al sta sot a scuindi la robe.

Si po cjantâ:

“Sant Michêl ch’al dîs il vêr
Se nol è chi al sarà culì”

Al è un zûc che no si à di imbroiâ, par sei juscj si à di mostrâ simpri chê altre man.

Sante Striche

E je une conte, ma ancje un zûc.

Si metisi sentâts cu lis gjambis lungjis e si fâs la conte, chel che i finìs la ultime peraule al tire dentri la gjambe. Si va indenant cussì fintremai che e reste une gjambe sole.

La conte a fâs cussì:

“Sante striche di pitiche, di pitoche carabule
Asinele, buine vite fo-ra-che-le.”

Il zûc da trie

Si disegne sul ciment  3 cuadrâts in lungjece, 2 in largjece, 1 in lungjece e altris 2 in largjece cuntun zessut.

Si cjol un claput e si lu tire tal cuadrât plui dongje, cuntun pît si salte, no li che al è il clap, ma in chel dopo simpri cuntun pît. Cuant che si rive intal dopli si puedin meti jù ducj doi i pîts, si va indenant fin ae fin, po dopo cuant che si torne indaûr si cjape sù il clap cence poiâ chel altri pît.

A turno si zuie, e il clap si lu bute simpri plui lontan fin che si à passât ducj i cuadrâts.

Se si poie il secont pît o si sbalie di tirâ il clap al zuie chel altri.

Trampui

Si fasevin cun doi boçs di bande, si foravin insom e si faseve passâ une cuarde in ogni buse.

Cjapant la misure juste si tignivin lis cuardis tes mans e si montave cui pîts sore, cjaminant si alçave ancje il boç e si veve di stâ in ecuilibri.

Il zûc al jere chel di cjaminâ in ecuilibri sui trampui cence colâ. Dificil ma une vore divertent!! Si veve di coordenâ ben pîts e mans tignint la cuarde ben tirade!!

Puce

Si zuie dividûts in dôs scuadris. Un al à la puce e tocjant chei altris la passe, chel che al ven tocjât al va dentri di un cercli, al po vignî liberât dai siei amîs. Si vinç cuant che si à cjapât ducj i fruts di chê altre scuadre. Po dopo si fâs cambio.