Vai direttamente al contenuto principale
Ora sei in: home > identikit di casa mia > Placis e glesiis dai nestris paîs
Logo di CollinRete

Identikit di casa mia

Placis e glesiis dai nestris paîs: Flaiban Grediscje San Lurinç San Durì Sedean

Classe cuarte di Flaiban

Con la collaborazione, per le correzioni in lingua friulana, della dott.ssa Michela Vit - Sportello intercomunale per la lingua friulana del 
Comune di Sedegliano e di Flaibano.

La place di Flaiban

La place di Flaiban si cjate tal mieç dal paîs e si clame “Place Monument”.
Li de place a rivin lis cuatri stradis principâls dal paîs: vie Indipendence,  vie Cavour, vie Rome  e vie Garibaldi.
E je cenglade di cjasis, di trê bars, di dôs buteghis di rosis e di plantis, di une buteghe di alimentârs, de buteghe de latarie di Mortean, di cualchi edifici jenfri chescj la Bancje di Credit Cooperatîf dal Friûl Centrâl, dal municipi, di un studi di comercialist e di un studi di dentist.
Sui marcjepîts ator de place si cjatin i arbui e i pâi de iluminazion.
La part de place indreçade viers lis buteghis e je a sens unic e e à tancj puescj par parcâ lis machinis e dongje di chescj e je une piçule fontane di aghe che si pues bevi.
Tal mieç de place al è un cedri secolâr une vore biel e cetant grant, cualchi banchine, un spieli di aghe delimitât di colonis di piere che al ricuarde il “Suei” ven a stâi il puest di incuintri dal paîs indulà che une volte si dave di bevi aes bestiis e indulà che si lavave la blancjarie e i peçots. Vie pe Vierte e vie pe Istât in chest spieli si metin in vore dai soflets di aghe che a regalin un efiet plasevul sedi ai voi che aes orelis.
Tal mieç al è il monument par ricuardâ chei che a son muarts in vuere, al è une vore alt e su la piche si viôt un leon e sui doi flancs cualchi muse che a bute aghe dentri tes vascjis.
E je cun di plui une aree grande di vert e cinc astis pes bandieris che a vegnin esponudis durant lis fiestis e lis ricorencis civîls.
Par rivâ li dal monument, li des bandieris e li des banchinis cence pescjâ la jerbe, a son dai cjaminaments di piere.
La place di sere e je plasevulmentri iluminade cun lampions e cun faruts che a metin in biele mostre il cedri, il monument, il “suei” e lis astis des bandieris.
In timp di Nadâl, te place al ven puartât un arbul grant insiorât di lûs blancjis.
Sul sfont si pues viodi la glesie cui plets di rosis e il poç vecjo.

cliche su la figure par ingrandîle

La place di Flaiban

La place di Grediscje

Un dai puescj che o preferìs dal gno paîs al è par sigûr la place. A Grediscje la place e je avodade ae Regjine Margarite.
La place al è chel lûc che al è tal mieç dal paîs, indulà che, soredut tai timps passâts, si passave un pôc di timp insieme. In dì di vuê al è stât fat un spazi di forme circolâr che al ven doprât tant che parc di machinis. Dute cheste aree e je fate cun tavelis metudis adun di mût di creâ tancj cerclis che a deventin simpri plui piçui fintremai tal centri.
Su la circonference si cjate il monument pai muarts in vuere; al è une vore grant e al è impussibil no fermâsi a cjalâlu cuant che si scjavace la strade a pîts. Al è fat di une sorte di  piramide metude adun cun claps grancj e su la cime e je une statue che e rapresente une femine cuntune vieste lungje, i cjavei siolts fin tes spalis cuntune coronute tal cjâf; e à une espression une vore serene e cuiete. Te man drete e ten une corone di orâr, invezit cun chê altre e ten dongje di se stesse un scût.
La figure di marmul blanc e rapresente la Patrie e al è un omaç a chei che a son muarts in vuere; ae base al è stât poiât un libri, ancje chest di marmul, indulà che a son segnâts i nons di ducj i soldâts muarts in vuere.
Dut ator al è stât fat sù un muret che al seguìs la forme de place indulà che la int si sente par fevelâ.
Dilà dal muret a son stâts plantâts baraçs e arbui piçui.
La place no je cetant siore o sflandorose, ma par sigûr al è biel podêsi cjatâ a cjacarà cui amîs ai pîts dal monument cemût che a fasevin i nestris gjenitôrs e prime ancjemò i nestris nonos.

cliche su la figure par ingrandîle

il monument pai muarts in vuere

La place di San Lurinç

La place di San Lurinç e à un zardin cuntun vialut di claps che lu travierse.
E je di forme triangolâr cui cjantons staronzâts.
Dut ator a son trê pins di mâr che a fasin ombrene su la plui part de place, cinc baraçs simpriverts, siet arbui di latifoliis doi di chescj cetancj biei e alts e par finî un arbulut simprivert cun fueis che pe lôr forme a samein ae palme di une man, cui ôrs taronts.
Tal mieç a son trê banchinis di len, suntun flanc de place al è il puarti pe fermade dal  autobus e dal scuelebus e su chel contrari al è une tabele di len indulà che al è marcât il percors cicli turistic dal “Stradon Manin”.
In ogni cjanton si cjate un ferâl cun dôs lûs.
Vie pal periodi di Carnevâl, la place e ven insiorade cu lis sagumis che a rapresentin lis mascaris tipichis: Arlechin, Pulcinella, Balanzone, Colombine, Gjanduie, Brighele.
Il zardin de place di San Lurinç al è simpri stât un lûc indulà che i fantats dal paîs si cjatin.

cliche su la figure par ingrandîle

La place di San Lurinç

La gleseute di San Zuan

La gleseute di San Zuan si cjate a Flaiban sul confin jenfri lis cjasis e i cjamps viers Cjiscjerne; par rivâ al è un piçul vialut di claps cu la iluminazion a paviment.
E je stade fate sù tal 1518 e po dopo, tai secui che a son vignûts daûr, e à subît dai mudaments.
E je une gleseute piçule di forme retangulâr cun colonis fatis cun modonuts ducj diviers un di chel altri.
Il tet al è realizât cun cops di tonalitâts di maron difarentis. Lis parêts di fûr a son pituradis di blanc. Sui flancs de glesie a son trê barcons, doi a àn la forme di un retangul e chel altri al è un templi; sul denant al è un puarti cun trê arcs, di chescj chel centrâl al è il plui grant. Picjât sul sofit dal sotpuarti al è un grant lampadari di veri; la puarte di jentrade e je di len di colôr maron scûr.
Cheste glesie no à il cjampanili, ma sul tet e je une crôs piçule di fier aromai rusinît.
La glesie e je cenglade cuntun marcjepît di ciment.
Devant de glesie al è un monument avodât ai alpins, di fat ancje la glesie e je cognossude tant che “gleseute dai alpins”. Il monument al rapresente un alpin in pîts sui crets cuntun fusîl in man.
Sul flanc a man drete de glesie si cjate une fontane piçule di piere.
Daûr al è un parc piçul par zuiâ furnît di une lisse, doi niçui e doi cjavai cu lis sustis. Dute la aree e je sierade cuntune cise e dentri a son arbui diviers.
La cjosse plui impuartante de glesie e je une sculture piturade in basrilêf sul altâr; chest al è un fat râr pe art di sculture dal Friûl.

cliche su la figure par ingrandîle

La gleseute di San Zuan

 

La glesie di San Durì

La glesie di San Durì e je une costruzion imponente e une vore biele. Ancje se si cjate intun paisut di pôcs abitants, la glesie e je une vore grande e tancj secui indaûr e jere un munastîr.
La storie dal puest indulà che e je stade fate sù la glesie e je antighe, di fat bielzà tal an 1000, si cjatave une capele.
Il non de glesie e ven di Durì nassût a Auguste te Baviere, che tornant indaûr te so Gjermanie di un viaç, al passà il vât dal flum Tiliment propit dongje de glesie.
La struture de glesie e va daûr a chel che al è il model de Basiliche di Aquilee: lis colonis a dividin lis trê navadis e par di fûr l’edifici al è une vore elegant cu lis “tors” verticâls tant che simbul par avodâ lis preieris.
La glesie di cumò e je stade fate sù jenfri il 1911 e il 1914 in stîl neogotic.
Su la façade a soreli a mont e je une piture a fresc, che forsi e va indaûr al decim cuart secul, e che e rapresente la imagjine di San Cristoful, protetôr dai viandants.
Dentri de glesie a son cuatri pituris dal Sietcent dai evangjeliscj.  
Tal 1991, par mieç di oparis di restaur, e je stade gjavade fûr, simpri dentri de glesie, une capele laterâl piçule che vie pal periodi di Nadâl e ven furnide di statuutis dal presepi.
La glesie di San Durì e je une des bielecis storichis dal nestri teritori, duncje se no la vês bielzà viodude…vait a visitâle!

cliche su la figure par ingrandîle

La glesie di San Durì

La glesie di Sedean

Il paîs di Sedean al cjate la sô carateristiche plui marcade te place grande di forme di ûf, indulà che e je la glesie e, sù par jù, di front di cheste, bessôl e ambiziôs al è il cjampanili une vore biel.
I lavôrs pe costruzion de glesie di Sedean a scomençarin ator dal 1720 e, dopo 35 agns di lavôr de int di Sedean, e fo screade e avodade a San Antoni Abât.
Te jentrade o cjatìn il portâl stagn di piere di Torean, cuntune puarte maestose di len massiç, al ven daûr il paviment che al à une crôs fate a scachiere blancje e nere che e cjape dut il curidôr centrâl.
Dentri o cjatìn cuatri altârs laterâi di marmul e di piere indreçâts a San Valentin, a San Ermacul, ae Madone de Salût e aes animis dal Purgatori.
Tal altâr maiôr, o viodìn tal mieç il tabernacul, cualchi figure di agnul, su la piche Crist resurît e dongje dal altâr doi çocui cun statuis.
Dilunc lis parêts si cjate la rapresentazion de Vie Crucis.
La glesie e je furnide di bancs di len, di doi confessionâi di len intaiât, dal pulpit, dal orghin metût parsore de jentrade e di barcons decorâts.

cliche su la figure par ingrandîle

La glesie di Sedean

Immagine della testata in alto: Panorama da Arcano Superiore
Per gentile concessione dell'autore, Vittorio Sgoifo socio del Circolo Fotografico "Ernesto Battigelli" di San Daniele del Friuli