Identikit di casa mia

Une cjacarade cui lavoradôrs

Scuola Primaria di Flaibano - classe seconda

I nestris paîs e son fats di cjasis, di stradis, di negosis, de place, de glesie e di tancj altris lucs, ma soredut e son une comunitât di personis.

O vin intervistât diviersis personis per capì ce mistîr che e fasin o an fa inte lôr vite.

Interviste a une infermiere

Di trops agns fâstu la infermiere?
A son 29 agns.

Ti plasial chest lavôr?
Sì, mi plâs ancjemò

Durant il to servizi âstu viodût tantis personis sufrî?
Magari cussì nô, ogni dì

Âstu assistût i tiei parincj?
Sì, o ai assistût ancje i miei parincj!

Ti isal muart cualchidun?
Sì, me agne Laura e mê cugnade Patrizia.

Parcè âstu decidût di fâ la infermiere?
Par judâ e par stâ dongje a lis personis che a àn mâl

In cuâl repart lavoristu?
O lavori tal repart di dialisi dulà che la int e à i rognons che no funzionin.

Ti displasie lavorâ tai dîs di fieste?
Sì, parcè che no stoi cu la mê famee.

Cuâi sono i ponts negatîfs dal to lavôr?
Viodi la int sufrî.

Cuâi sono i ponts plui biei dal to lavôr?
Viodi il malât che al sta ben e ogni tant cualchidun che al ven traplantât e che al vuarìs.

Interviste a Vilma

Dulà lavoravistu?
O lavoravi ta la "filande"

Ce mût jerial il to lavôr?
O vevi un banc di lavôr di fier con 2 cjalderis che a vevin dentri aghe di bol: che e vignive scjaldade cul cjarbon piât a sîs di buinore. Ta la prime cjaldere o vevi di "scumulâ" cuntun scovet che al jere daûr dal banc di lavôr.
Si incjastravin lis galetis tal scovet e dopo si metevin a boli par fâ vignî fûr il fîl che al passave intun gançut e al lave a fâsi sù intune madasse.
I fîi da lis madassis a vignivin lavorâts insieme e cussì al vignive fûr il veli di sede.
Se il fîl al jere sporc o lis madassis no jerin perfetis tu cjapavis la multe.

A ce ore ti sveavistu?
Mi sveavi a trê di buinore, o lavi tal cjamp a judâ gno pari e mê mari dopo, a siet, a la prime sivilade de sirene o lavi in fabriche. O vignivi a cjase a misdì, o gustavi e dopo o tornavi in fabriche. A trê dopomisdì o tornavi indaûr e o lavi ta la stale a molzi lis vacjis.

Trope int jerie ta la filande?
A jerin otante "sgropinis" une par ogni cjaldere, 40 mestris, 2 mecanics e lis sioris che a filavin li madassis.

A trops agns âstu scomençât a lavorâ?
O ai scomençât a lavorâ a tredis agns e o ai finît a vincjesîs parcè che mi soi maridade.

Il camionist

Ti plasial fâ il camionist?
Sì ma al è simpri plui complicât il mût di lavorâ, par esempli cumò bisugne rispietâ une vore lis oris di vuide.

Âstu vût problemis la prime volte che tu âs vuidât il camion?
No, e dut câs cul passâ dal timp si impare.

Parcè âstu decidût di fâ il camionist?
Parcè che ancje gno pari al faseve il camionist e mi plaseve ancje a mi. O ai scomençât a vincj agns.

Ce traspuartistu?
O traspuarti mobii di cjamarutis.

Cemût ti cjatistu tal camion?
Tai camions modernis di vuê mi cjati une vore ben, a son ben furnîts soredut par durmî.

Trops camions âstu vût? Di ce marcje jerino?
O ai vût cinc camions: il prin, un Fiat e ducj chei altris a jerin Mercedes.

Ti isal mai capitât di lâ fûr di strade?
Sì, une volte incrosant un altri camion su une strade strete e la seconde volte sbrissant su la strade glaçade.

Trops chilometris fasistu intun dì? E trops intun mês?
O fâs 500 chilometris al dì par un totâl di 10 000 sù par jù chilometris al mês.

Tropis multis âstu cjapât? Parcè?
Cualchi multe le ai cjapade, o par sorpàs improibît cun altris camions o pe velocitât o pes oris di vuide.

Tropis consegnis fasistu in dì?
O fâs 8 consegnis sù par jù in dì.

Tropis oris viazistu in di?
O fâs 9 oris sù par jù di vuide in dì.

In tropis regjons sêstu stât a consegnâ? Vâstu ancje tal forest?
Une volte o lavi ancje tal forest (France, Gjermanie, Austrie) cumò o cor dome in Italie; in tancj agns o soi stât a fâ consegnis in dutis lis regjons talianis.

Cuâl isal stât il to viaç plui lunc?
Il viaç plui lunc lu ai fat in Sicilie.

Cuale ise la regjon che ti è plasude di plui?
La regjon che mi è plasude di plui e je la Umbrie.

In trops ristorants âstu mangjât ben?
O ai mangjât ben in diviers ristorants su la Adriatiche.

Secont te cuale ise la marcje miôr di camions?
La marcje miôr di camions e je il Scania.

Dopo tancj agns che tu coris, volaressistu cambiâ mistîr?
Cu lis normis ultimis e lis complicazions dal lavôr di camionist, mi ven propit voie di cambiâ mistîr!

Interviste al miedi

Cuant âstu scomençât chest lavôr?
In Fevrâr.

Parcè âstu volût fâ chest lavôr?
Par judâ la int che e sta mâl e par imparâ da li robis che a puedin judâ te e la tô famee.

Trops agns coventino par deventâ miedi?
La universitât e dure sîs agns dopo tu âs di fâ un esam di stât.

Ti plasie fâ il to lavôr?
Sì, parcè che tu âs une grande sodisfazion cuant che la int che e jere malade e vuarìs e e pues tornâ a cjase.

Cemût ti sintistu cuant che un malât al vuarìs?
O soi content stant che al pues tornâ da la so famee e al pues stâ ben.

Cuant ti ise vignude la idee di fâ il miedi?
Cuant che o soi stât a viodi la presentazion da la facoltât di medisine ta la universitât, o jeri ancjemò ta la scuele superiôr.

Cuâl isal par te l'aspiet positîf dal to lavôr?
Il fat di podê judâ une persone che e sta mâl e tornâ a fâi fâ la vite che a fasin ducj chei che a stan ben.

Cuâl isal par te l'aspiet negatîf?
Un aspiet negatîf al è che ogni tant ancje metìnle dute no si rive a vuarî ducj, un altri che cualchi volte si à di meti il lavôr devant da la famee, e soredut che si scuen lavorâ tai dîs di fieste.

La passion di scrivi

Cemût ise nade la passion di scrivi par furlan?
La passion di scrivi par furlan mi è nassude bessole e prime di dut, tal pinsîr. O ai simpri pensât par furlan, cussì o ai ritignût just scrivi cu la lenghe che o pensavi e che o vevi imparât dai miei gjenitôrs.

Cuale ise stade la opare che o vês scrit par prin?
La prime opare, se cussì si vûl clamâle, e je stade une poesie in rime, che no me la impensi. Se no me la ricuardi al vûl dî che no veve nuie di impuartant.

Vêso studiât la lenghe par rivâ a scrivi cun bravure? Dulà?
Tal imprin o scrivevi come che o fevelavi, dopo o soi lade par trê agns a scuele di furlan, la sere, a Sedean. Tant che mestri o vevi Fausto Zof.

Trops libris vêso scrit?
O ai scrit doi libris di poesiis, doi romançs curts, vot senis teatrâl, (sîs a son stadis metudis in sene e puartadis ator pal Friûl), o ai voltât par furlan "Mia terra, addio" di Padre David Maria Turoldo, une conte pai fruts e o ai colaborât cul pitôr Otto D'Angelo tal so libri " Feminis furlanis".

Cuâl lavôr jenfri chescj al à vût plui sucès?
I libris par furlan no àn mai tant sucès, stant che lis personis che ju lein a son pocjis. Scrivi mi plâs e lu fâs sorenuie, ancje se no ai nissun vuadagn la passion no mi à mai bandonade.

Ise contente dai siei lavôrs?
Sì, o soi contente di ce che o ai rivât a fâ. Ce che o ai scrit e ce che o scrîf, no son voris di grant valôr, ma piçulis gjondis, dutis mês e de mê famee, che o plati e che o ten come un tesaur te musine dal cûr.

Di ce cjacararaial il so prossim libri?
Ta la prossime opare o tratarai la storie, lis usancis, i personaçs e altris cjossis dal nestri Comun. Chest libri, il prin, al sarà in lenghe taliane.

Il carpentîr

Bundì, cemût ti clamistu?
Bundì, mi clami Tiso, di cognon o fâs Cigainero.

Trops agns âstu?
O ai 87 agns.

Dulà sêstu nassût? E dulà âstu vivût?
O soi nassût ai 16 di Març dal 1924, a Muçane. O soi stât simpri a Muçane a part cuant che o soi stât presonîr sot dai todescs, in Gjermanie.

Ce lavôr fasevistu?
Cuant che o jeri in famee, o lavoravi tant che contadin insiemi cun gno pari e i miei fradis. In Gjermanie o ai fat il fornâr. O soi tornât e o ai lavorât ancjemò ta la tiere fin al 1959. Dopo, no si veve mai un franc in sachete e cussì o ai decidût di cambiâ mistîr e o ai scomençât a fâ il carpentîr.

Dulà âstu lavorât?
O ai lavorât cuasi simpri a Triest e ta la zone di Monfalcon.

Trops agns?
O ai lavorât dal 1960 al 1984, cuant che o soi lât in pension e duncje o ai fat 24 agns, a bati il martiel

Ma ce fasial il carpentîr?
Il carpentîr al prepare lis armaduris o miôr, disin cussì lis scjatulis di len che a coventin par gjetâ il bitum e al fâs i pilastris, i trâfs, lis scjalis, lis parêts di une costruzion. Vuê no si fâs plui cussì parcè che si usin lis armaduris di fier bielzà prontis, dome di montâ.

Ma ce costruiviso? E fasevistu dut tu?
Si costruive sedi cjasis piçulis di un o doi plans sedi gratecîi di cuindis plans. No. No. No fasevi dut jo, a jere la scuadre dai carpentîrs e dopo a vevin i feraioi (=chei che a lavoravin il fier) e i muradôrs, a jere une imprese avonde grosse.

Ma ce mût lavoravistu?
I miei imprescj a jerin: la see, il martiel, i clauts, la borse dai clauts, il metri di len e la curdele.

Ma ce ise la curdele?
La curdele al è un metri lunc 20 o 25 metris, di plastiche o di metal, dentri di une scjatute taronde e scliçade che e à un menul par tirâ fûr e par tornâ a fâ sù la curdele dopo di vê misurât.

Ce mût si davuelzevial il lavôr?
Jo o fasevi lis scjatulis su la base dal dissen fat dal architet, si fasevin lis parts indicadis dal progjet.

E chei altris ce fasevino?
I feraioi fasevin lis gabis di fier che a lavin metudis dentri da lis scjatulis. Dopo i muradôr a gjetavin il bitum che al è ciment e savalon misturât cu la aghe: e vignive fûr cussì il ciment armât.

La sartore

Lavoristu ancjemò o sêstu in pension? Ce lavôr fasevistu?
O soi in pension e o fasevi la sartore.

Cuant âstu scomençât a lavorâ?
O ai scomençât a lavorâ a 9/10 agns, o vignivi a cjase di scuele e o lavi tal "laboratori" cun gno pari e cun mê mari a cusî.

Dulà lavoravistu?
O lavoravi a cjase, intune stanzie plui grande, cun dôs machinis di cusî a pedâl, une taulone grande (il "banc") che e servive par taiâ la stofe e une taulute plui piçule cuntune cuviertute parsore che a servive par sopressâ la robe.

Cui ti aial insegnât a cusî?
Mi àn insegnât gno pari e mê mari parcè che a jerin sartôrs.

Tropis oris lavoravistu al dì?
Si lavorave dut il dì, cualchi volte da lis 7/8 di buinore fin a miezegnot; a Pasche e a Nadâl si lavorave ancje dute la gnot. Il nestri lavôr al vignive paiât une vore pôc.

Ti plasevial il tô lavôr?
Mi plaseve avonde, ma, par disi la veretât, in chê volte bisugnave fâlu e baste. A voltis o provavi invidie di chês che a lavin tal cjamp e jo o scugnivi simpri stâ sentade li.

Vuadagnavistu avonde?
In cjase, jo o lavoravi e vonde, no vignivi paiade, invezit gno pari e mê mari a vuadagnavin juste chel che a coventave par rivâ a vivi. Ancje dopo maridade, cuant che o lavoravi par gno cont, o cjapavi pôc.

Cuale ise stade la tô prime "creazion"?
A 7/8 agns o ai fat un capotut par la mê pipine e o ai fat ancje il picjadôr di len, dopo lu ai picjât devant dai vistîts che a vevin fat gno pari e mê mari.

Ti dedicavistu dome al vistiari o cusivistu ancje altre robe?
O cusivi di dut; o ai fat tendons, mantovanis, o ai rivistît cussins, poltronis, sentis di machine, o ai ricamât linçûi,…..insome di dut!

Fasevistu lis feriis?
Lis feriis no esistevin par me; spes no jere fieste nancje il sabide e la domenie.

Ti ricuardistu di un lavôr che al jere vignût particolarmentri ben?
Cumò no mi impensi……ma par sigûr mi jerin vignudis ben lis cjamesutis che o vevi ricamât pes mês fiis.

Âstu mai cambiât lavôr? Ce âstu fat?
Sì, o ai smetût di cusî par la int parcè che o ai vût un distributôr di benzine, propit fûr da la puarte di cjase.

Tropis oris lavoravistu al dì?
In principi no esistevin oraris e si restave a disposizion di buinore fin che si lave a durmî……Ma ancje dopo no si tignive tant a ments i oraris.

Ti plasevial il to gnûf lavôr?
Si lu acetave.

Vuadagnavistu avonde?
Si vuadagnave une vore pôc. Cualchi volte cualchidun nol paiave e une volte o vin riscjât di jessi robâts.