Vile

Pluc e va a finîle tal rubinet dal panetîr e li e cjate la farine e ancje il sâl.

- Ma cui sono chei chi? Ce àno voie di vê di me?

Il panetîr al fâs l’impast pai biscots: orpo ce bon!

Cumò une ombre si svicine a chest impast e e sclice la gotute indenant e indaûr e le sparnice par dut. Pluc e cole dal impast e e va a finî une altre volte intun tubo dulà che e cjate altre aghe,  e ven scaraventade di ogni bande e e cor fin tant che e rive intal mâr, un puest cuiet dopo dute che fadie e chel lavôr.

-Finalmentri! Chi si sta propit ben … i fasarai un sium!- e dîs.

Ma a un ciert pont un pescjadôr al ruvine cheste pâs: cu la rêt al pescje il pes e, cence volê, al cjape sù ancje la puare Pluc. Dopo cualchi ore, Pluc e rive al ristorant. I cogos a cjapin sù il pes par cusinâlu, lu sgotin ….

-Judimi!- e berghele Pluc. 

Al rive il camarîr  e al berghele spaventât: - Cui aial fevelât?

Pluc e rispuint: - O soi jo, mi clami Pluc e o soi une gotute.

Il camarîr al clame il paron dal ristorant e al berghele: - Anìn, anìn di là, e je une gote di aghe che e tabaie!

Il paron infastidît i dîs: - Ma sêstu mat, no esistin gotutis che a tabain! Fermile, se no ti licenzii!!!

- No, no, no stâ licenziâmi, anìn a viodi ca!

Ma il paron nol viôt nuie e al licenzie il puar camarîr.

Trep

Il cogo intant al prepare une mignestre cun dentri Pluc, po le puarte a un client. Ma le mignestre no je masse buine e il cogo al scuen butâle jù pal seglâr. Cussì Pluc e finìs intes fognis e, di li, di gnûf intal mâr. Dopo un pôc e finìs parsore di un vulcan che al sclope e Pluc e svapore.

-Finalmentri o soi libare! – e berghele, e intun moment e devente un nûl. Ma subite dopo al tache a sbisiâ e Pluc avilide e pense: “ O soi propit sfortunade” e e cole jù.

Vile

E cole intune poce di aghe che un frutin al sta fasint.

Pluc e prove a saludâ il frutin:

- Mandi frutin, jo o soi une gotute di aghe e mi clami Pluc!

E il frutin : - Ce sunsûr isal, no capìs!

Pluc si sfuarçe di fevelâ plui fuart: - O soi ca, inte poce!

Il frutin al rispuint:- Mi displâs, ma no sint!

A chest pont Pluc si rassegne e si indurmidìs.

Cuant  che si svee  si cjate intal mieç dal mâr. E viot altris gotutis che a zuin insieme plenis di morbin; alore e decit di lâ cun lôr.