<<

Sedean

Il comun di Sedean al cjape dentri chê part de planure furlane che e je dilunc de zone çampe e di mieç dal Tiliment.

In chest teritori a son stâts individuâts insediaments preromans (cjastelîr e tombis) e elements de colonizazion romane (stradis, centuriazion, urnis pes cinisis dai muarts...) ancje se si pues dî che la ete medievâl e je par sigûr la plui impuartante dal pont di viste storic.

Il teritori al è plen di cortinis, fuartecis di planure e sîts di difese cun grancj fossâi taronts. Daspò des invasions dai Ongjars (secul X), in Friûl si fissà la struture sociâl tipiche de Ete di Mieç.

Dal 1257 al risulte che Indrì di Vilalte e tancj altris cjistielants furlans si impegnarin a mantignî sorenuie par un an i cjavai e i soldâts che a coventavin par difindi un cjistiel gnûf che al veve di sei fat intun puest che al veve non Sedean, dongje Voleson.

La fuartece cui mûrs a corone e il tor par jentrâ si pues viodile intun fresc de glesie dai sants Pieri e Pauli di Sedean.

A mieç dal Tresinte in paîs si faserin sentadis dal parlament furlan, une assemblee di predis, nobii e comunitâts par esaminâ lis cuistions plui impuartantis.

Dopo dal Cinccent, intant di un timp di pâs lunc, si moltiplichin lis realizazions artistichis leadis cui sîts di cult.

Cualchi esempli di une art nassude de religjon popolâr si lu à te costruzion e tal furniment de glesie di Sant Antoni Abât, fate sù dal Sietcent.

Magari cussì no, rivât Napoleon, i otons e i arints a forin fondûts par bati monede e fâ canons; cussì si pierderin i cjandelîrs plui biei, dôs cjampanis de Madone dal Rosari, une cjampane di Sant Antoni Abât e dôs de glesie dal simitieri.

Napoleon al fo batût dai Austriacs che a ocuparin il teritori fintremai la fin de tierce vuere di indipendence dal 1866.

Ancje a Sedean intal mês di otubar si fasè la votazion par jentrâ in Italie e il plevan, pre Vargjent, al invidà la int a sielzi l’Italie.

Dal pont di viste urbanistic Sedean al è logât dilunc des stradis che a menin tal centri: intune place ovâl a son il bar, la pompe di benzine, buteghis, bancjis, la pueste, il municipi e la glesie vecje.

Pôc lontan de place, intune altre place là che a son la scuele elementâr, che e cjape il non di David Maria Turoldo e la scuele medie, che e cjape il non di Martin Luther King, si pues viodi il mûr di cente une vore colorât, progjetât e fat di un artist locâl e dai fruts de scuele.

Sedean al è famôs massime pal cjastelîr, il monument di ete preistoriche plui preseôs e conservât miôr in Friûl (si trate di une tipiche fuartece difensive di planure). Il cjastelîr al è cussì famôs che une des corâls di Sedean e à non “il Cjastelîr”: a chei di Sedean ur plâs cjantâ e tal teritori dal comun a son une vore di corâls, plui di cinc! E il Cjastelîr e je la plui famose e impuartante.

La int di Sedean e fâs une vore di mistîrs; se une volte l’agriculture al jere il principâl, cumò in tantis fameis si fâs un altri lavôr e si staronze cu la campagne.

Ogni an in place si fâs la sfilade di Carnevâl: dai paîs dongje a rivin i cjars colorâts e po si cjatisi sot di un tendon par gustâ insieme e dâ i premis ai cjars plui biei.

La nestre biblioteche e je dedicade a un grant passionât de lenghe e culture furlanis, Agnul di Spere.

Gli abitanti di Sedegliano svolgono diverse attività, un tempo quella principale era l’agricoltura, ora in tante famiglie si fa un altro lavoro e si arrotondano le entrate con attività svolte in campagna.

Ogni anno, in piazza, si svolge la sfilata di Carnevale: da tutte le frazioni arrivano i carri più colorati e dopo ci si ritrova sotto un tendone per pranzare insieme e premiare i carri più belli.

La biblioteca è stata dedicata ad un appassionato sostenitore della lingua e della cultura friulana, Agnul di Spere.

Un puest par cjatâsi, dongje de biblioteche, al è “Cà dal Bafo”, un pancôr là che si puedin cercjâ dolçs par ogni ocasion e gust.

I cjamps di Sedean a dan blave, vin, miluçs, soie, patatis e tai orts, tignûts massime des nonis, si cjapin sù pomodoros, patatis, carotis, selino, fasûi, sparcs, râfs e v.i.

Lant a Udin si cjate la gleseute de Madone là che si maridin tantis cubiis; a mai i zovins, il plevan e ducj chei di Sedean, di sere, a disin rosari.

Piture de Madone

In vie san Pauli, tune parêt stabilide, dentri di une curnîs sagomade, si viôt piturade une Madone sentade, che e ten sù lis mans e e cjale il Frut poiât sui zenoi.

Di fondâl un tron cul schenîl alt. I colôrs plui presints a son il ros, il blu e il blanc.

Si trate di une piture religjose popolâr, opare di cualchi pitôr di madonis furlan, atîf tal XIX secul. Sore di mangjâ e di durmî chescj pitôrs di madonis a frescjavin Madonis e Sants, copiâts di mestris di buteghe inscuelâts.

Gleseute dal simitieri di Sedean

La gleseute dal simitieri di Sedean e je antighe, tor dai secui XIV- XV.

Une des oparis plui bielis e impuartantis al è il vieri portâl, fat tor dal 1497 di Antonio Pilacorte di Spilimberc.

Chest portâl al à 47 cjâfs di agnui in altrilêf; di ca e di là a son lis musis di san Pieri e san Pauli, che a dan il non ae gleseute.

Il Vatican

Il Vatican al à chest non par vie che lis cjasis a son in cercli e la int che e jere a stâ e jere puare. Ogni famee e veve dôs stanziis, ducj a vivevin tal strent.

Tal curtîl a jerin piçulis stalis cun dôs-trê vacjis. Ogni famee e veve un mus, un gjalinâr e cualchidun ancje lis pioris parcè che in chê volte maris e nonis a filavin la lane in cjase par fâ i cjalcins e lis mais e po a lavoravin tal ort. E jere miserie parcè che no jere nissune industrie, nol jere lavôr; a jerin i contadins che a lavoravin il Vatican.

Cjase Tessitori

La cjase Tessitori e je sù par jù dal 1500.

E jere dentri tun unic complès tacât dal municipi parcè che no esisteve la strade che vuê e mene a San Laurinç.

La famee dai Tessitori e rivà di Mueç tal 1800; a jerin costrutôrs vignûts par fâ sù i cjampanilis di Sedean e Coder.

I Tessitori, in fuarce dai bêçs fats tant che costrutôrs, a jerin l’uniche famee di Sedean che e veve cjamps siei.