La storia di Erika
La storie di Erika

La Storie di Erika

 

di Ruth Vander Zee e Roberto Innocenti

Dal 1933 al 1945 sîs milions di Ebreus, la mê int, a son stâts copâts.
Cul fusîl, lassâts murî di fam, cul gas, brusâts tai fors.
Jo no.
Jo o soi nassude plui o mancul tal 1944.
No sai di precîs cuant.
No sai nancje il gno vêr non.
No sai di dulà che o ven.
No sai se o vevi fradis o sûrs.
La uniche robe che o sai, e je che o vevi dome pôcs mês, cuant che o soi state salvade dal Olocaust.

Tantis voltis mi domandi ce infier che a à scugnût frontâ la mê famee dilunc lis ultimis setemanis passadis insiemi. O pensi a mê mari e a gno pari privâts di dut ce che a vevin, parâts vie di cjase, sierâts tal ghet.
Dopo al è rivât l'ordin di evacuazion. No vedevin la ore di podê finalmentri lassâ chel cuartîr scjafoiât cul fîl spinât, di scjampâ dal tif, da la cragne, da la fam.
Ma savevino là che o saressin lâts a finî? Ju vevin di sigûr imbroiâts.
Ce ur vevino prometût? Avonde ce mangjâ, un lavôr? Vevino mai sintût fevelâ dai cjamps di concentrament, là che la int a jere mandade a murî?

Mi domandi ce che a àn sintût tal lôr cûr cuant che a son rivâts li da la stazion dai trens; centenârs di Ebreus ingrumâts come bestiis e cjariâts cu la fuarce sui vagons sporcs, chei doprâts pai nemâi. Dome puescj in pîts.
E lis puartis tressadis su la lôr pôre.

Il tren si fermave in ogni paîs, par fâ montâ sù altre int. Daspò al tornave a partî. Trops dîs isal durât il viaç?
Par tropis oris i miei gjenitôrs sono restâts in pîts, sfracaiâts un cuintri di chel altri?

O pensi a mê mari che mi abrace strete, come par protezimi da la puce, dal vosâ, dal vaî, da la pôre, che a jerin tal vagon.
Al jere clâr, aromai, che di chel viaç nol sarès tornât indaûr nissun.

O cîr di imagjinâmi in cuâl pont dal vagon e jere mê mari. Forsit tal mieç. E gno pari, jerial li dongje di jê? Ce i varaial dite? Di jessi coragjose? Che nol jere nuie altri ce fâ?

Cuat àno cjapât la decision?
Forsit mê mari e a scugnût fadiâ no pôc par rivâ dongje da la paret di len dal vagon. "Permès! Scusait! Scusait!"
cuissà se e à dite il gno non, intant che mi faseve sù strete intune cuvierte di lane.
Se mi à bussade e mi à dit trop che mi voleve ben. Cuissà se e à vaiût. Se e à preât.

Il tren al à scomençât a là plui a planc, prime di jentrâ intune piçule stazion. Mê mari, alore, e à di sei lade dongje da la uniche barconete, une sfese di dulà che al passave dome un fîl di aiar.
Forsit cualchidun ju à judâts. Daspò mi à tirade sù, parsore il so cjâf.
Ce che al è sucedût dopo, e je la uniche robe che o soi sigure.

Mi àn butade fûr dal tren.

Mi àn butade su la jerbe, dongje il passaç a nivel.
E jere int, ferme devant dai binaris. A spietavin di podê passâ e mi àn viodude me svolâ fûr dal vagon. Tal so viaç viers la muart, mê mari mi à tirât dentri da la vite.

Cualchidun mi à cjapade sù e mi à fidade a une femine che mi à tirade sù e che par me e à riscjât la sô vite. E à cirût di capî, plui o mancul, trops mês che o vevi e si è inventade une zornade pal gno complean. Mi à clamade Erika. Mi à dât une cjase, di mangjâ, di vistî, mi à mandade a scuele. E mi à volût ben.

A vincjeun agns o ai maridât un om maraveôs. Insiemi o vin vût trê fîs e cumò o sin ancje nonos. Ta lis lôr mussutis, jo o viôt la mê.

Une volte cualchidun mi à dit che tal mont a son tancj ebreus, come lis stelis tal cîl. Sîs milions di chês stelis a son coladis jenfri il 1933 e il 1945. Ognidune di chês stelis e jere part di me. Ognidune di chês stelis e jere un om o une femine che ur je stade profanade la vite, che ur è stât butât jù l'arbul gjenealogjic.

Cumò la mê int e à metût gnovis lidrîs.

E la mê stele e je ancjemò là sù, che e lusìs.

Cualchi domande su la storie

 

Par capî

1. Cui isal il protagonist di cheste storie? Cuant la contie?

2. Cemût pensie che e sedi stade la vite pai siei gjenitôrs?

4. Parcè pensie che i siei gjenitôrs a àn scugnût butâle fûr dal tren?

5. Secont te, cemût ise state la infanzie di Erika?

6. Cemût si sintie Erika a la fin dal libri? Parcè?

Sui dissens

1.
Come che si lei ta la storie di Erika, i ebreus a son stâts metûts in vagons di bestiis e puartâts tai cjamps di stermini. Vagons fâts par podê meti 8 cjavai a traspuartavin invezit plui di 100 personis.

Tante int a scriveve di scuindon un messaç suntun tocut di cjarte e lu meteve jenfri lis breis dal vagon. In chest messaç la int e à contât l'amôr par la famee e pai amîs o e à contât ce che al stave sucedint.

Cjale i dissens in blanc e neri da la Storie di Erika e prove ancje tu a scrivi un messaç.
Tu puedis scrivi ce che al sta sucedint o ce che la int e pensave o e provave tal so cûr.

Cumò cjale la figure a colôrs e prove a scrivi il messaç che Erika e scrivarès a sô mari.

2. Prove a cjalâ i colôrs che il pitôr al à doprât pai dissens di cheste storie.
A ce ti fasino pensâ? Ce emozion pandino?
Secont te, parcè aial pensât di piturâju cussì?

3. Parcè tes figuris no si viodie nancje une muse?

4. Ce vuelie dî la peraule “verboten”?

5. Secont te, parcè il birocin isal stât bandonât li da la stazion?

6. Cjale la ultime figure dal libri. Erika e sta cjalant il tren che al passe. A ce pensie?

7. Ce vuelie dî la stele zale che e je su la cuvierte dal libri? Parcè Erika finissie la sô storie disint che la sô stele e lusìs ancjemò?